5 Krossteigen

Området her vert kalla Krossteigen, og her startar oppturen til eit stort nett av stiar rundt Eivindvik. Kulturvandringsløypa følgjer den mektige «Prestegardsmuren» som tidlegare gjekk rundt heile innmarka på prestegarden. Det var prost Dahl som fekk bygd muren. Den er om lag 1,5 km lang og skulle skilje mellom utmark og innmark. Muren vart bygd i stein for å spare skogen , og kanskje som brannvern. Muren vart ferdig rundt 1825. Bønder i området stod for muringa - etter seiande for 1 krone dagen. Det kvite huset i Fonnevika, ved sjøen på andre sida av Prestesundet, vart bygd av prost Dahl som eit døme på god byggeskikk. Huset vart seinare nytta som både skulehus og bustad. Mellom anna budde kapellanane her. I Fonnevika var det elles ei tid på 1800-talet både margarinfabrikk, fargeri, bakeri, dampskipsekspedisjon, postopneri og tingstove. Du kan også sjå at Prestegardsmuren som går rundt innmarka til prestegarden i Eivindvik fortset på andre sida av Prestesundet i Fonnevika.