7 Leidangen

Utgjerdsbolken i Gulatingslova fortel om vårt første organiserte, sjøbaserte forsvar; Leidangen. Landet var inndelt i ”skipreid”, områder som hadde ansvar for å utstyre båtar med mannskap, proviant og våpen for ein bestemt tidsperiode, til å delta i kongens Leidangsflåte. Til Leidangsvesenet hørte eit varslingssystem med veter (vardar) på fjella. Her var det ei vardevakt som skulle passe på å tenne varden om han såg andre tente veter. Dette var eit særs effektivt system som kunne mobilisere heile kysten i løpet av ei veke. I Ytre Sogn samla Leidangen seg etter soga på Utvær. Der er det ei skjerma hamn ein kunne ligge og vente i. Når heile Leidangen hadde samla seg, kom kongen og flåten gjekk mot framande hærmenn som nærma seg sjøvegen. Rundt Gulatinget er det fire slike store veter, mellom anna på Flolidfjellet som du kan sjå over tusenårsstaden mot nordvest.